Loading...

Wednesday, May 25, 2011

சமச்சீர் கல்வி பாடத்திட்டம் - நீடிக்கும் சிக்கல்!



சமச்சீர் கல்வித் திட்டம் மாணவர்களின் கல்வி தரத்தை உயர்த்தும் வகையில் இல்லாததால், இந்த ஆண்டு பழைய பாடப்புத்தகங்களையே பின்பற்றலாம் என்றும், தரமான சமச்சீர் கல்வித் திட்டத்தை கொண்டு வர ஆய்வுக் கமிட்டி அமைக்கப்படும் என்றும் தமிழக அமைச்சரவை முடிவு எடுத்துள்ளது என்ற செய்தி கல்வியாளர்கள் உள்ளிட்ட பலரை அதிர்ச்சிக்குள்ளாக்கியுள்ளது.

தமிழ்நாட்டில் மாநில கல்வி, மெட்ரிக், ஆங்கிலோ இந்தியன் மற்றும் ஓரியண்டல் கல்வி வாரியம் என்று நான்கு வகையான பாடத்திட்டங்கள் நடைமுறையில் இருக்கிறது. இதில் ஒவ்வொன்றிற்கும் பாடத்திட்டம் மற்றும் தேர்வுமுறைகள் வேறு வேறானதாக இருக்கும். மாநில கல்வி பாடத்திட்டத்தின் கீழ் படித்த ஒரு மாணவனின் கல்வி தரத்தை விட மெட்ரிக், ஆங்கிலோ இந்தியன் மற்றும் ஓரியண்டல் கல்வி பாடத்திட்டத்தின் கீழ் படித்த ஒரு மாணவனின் கல்வித் தரம் அதிகமாக இருக்கும். இதனால், மாணவர்களிடையே கல்வி நிலையில் ஏற்றத் தாழ்வுகள் இருக்கும். இந்த குறைகளை எல்லாம் கலைந்து மாநிலத்தில் உள்ள அனைத்து மாணவர்களும் ஒரே மாதிரியான கல்வியை பெற வேண்டும் என்பதற்காக கொண்டு வரப்பட்டதுதான் இந்த சமச்சீர் கல்வி பாடத்திட்டம்.

கடந்த ஆட்சியில் இந்த திட்டத்தை செயல்படுத்தும் விதமாக கடந்த ஆண்டு ஒன்று மற்றும் ஆறாம் வகுப்பிற்கு முதற்கட்டமாக சமச்சீர் கல்வி பாடத் திட்டம் அறிமுகப்படுத்தப்பட்டது. அதன் தொடர்ச்சியாக இந்த ஆண்டு, 2, 3, 4, 5, 7, 8, 9, 10 ஆம் வகுப்புகளுக்கு சமச்சீர் கல்வி பாடத்திட்டத்தின் கீழ் புதிய பாடத்திட்டத்தின் அடிப்படையில் பாடப் புத்தகங்கள் அச்சடித்து, மாணவர்களுக்கு விநியோகிக்கும் வகையில் தயார் நிலையில் வைக்கப்பட்டிருந்தது. பள்ளிகள் திறக்கும் ஒரு சில வாரங்களே இருக்கும் தருவாயில்தான், சமச்சீர் கல்வித் திட்டம் மாணவர்களின் கல்வி தரத்தை உயர்த்தும் வகையில் இல்லாததால், இந்த ஆண்டு பழைய பாடப்புத்தகங்களையே பின்பற்றலாம் என்று தமிழக அரசு இந்த தடாலடி உத்தரவை பிரப்பித்தது. பழைய புத்தகங்களை அச்சிடுவதற்கு கால அவகாசம் தேவைப்படுவதால் பள்ளி திறக்கும் தேதியை ஜூன் 15க்கு மாற்றி அரசு ஆணை பிறப்பித்துள்ளது.
அரசின் இந்த நடவடிக்கை சரிதானா? உண்மையில் மாணவர்களின் கல்வி தரத்தை உயர்த்தும் வகையில் சமச்சீர் கல்வித் திட்டம் இல்லையா என்பது குறித்து கல்வியாளர்கள் சிலர் தெரிவித்த கருத்து:

தாமரைக்கண்ணன் (நிறுவனத் தலைவர், தமிழ்நாடு ஒருங்கிணைந்த பட்டதாரி ஆசிரியர் கழகம்): சமச்சீர் கல்வித் திட்டம் நல்ல திட்டம்தான். அதில் எந்த மாற்றுக் கருத்தும் கிடையாது. மாநில கல்வி வாரியம், மெட்ரிக், ஆங்கிலோ இந்தியன், ஓரியண்டல் கல்வி வாரியம் இப்படி எல்லா வகையினருக்கும் ஒரே மாதிரி பாடத்திட்டத்தை கொண்டு வந்தால் மட்டும் அது சமச்சீர் கல்வித் திட்டம் ஆகிவிட முடியாது. கல்விக் கட்டணம், உள் கட்டமைப்பு, ஆசிரியர்கள் தேவைகள் இதுபோன்ற காரணிகளும், சமமாக இருந்தால் மட்டுமே அது சமச்சீர் கல்வி திட்டம் என்கிறார்கள் மிகப்பெரும் கல்வியாளர்கள். மாநில கல்வி தரத்தை பார்க்கும்போது, மாநிலத்தில் பல்வேறு மாவட்டங்களில் அரசுப் பள்ளிகள், அரசு உதவிபெறும் பள்ளிகளில் முறையான கட்டடங்கள் இல்லாமல், வகுப்புகள் மரத்தடியில்தான் நடந்து வருகிறது. மேல்நிலைப் பள்ளி மாணவர்கள் அமர சரியான இருக்கைகள் கிடையாது. சில முக்கியப் பாடங்கள் கற்றுத்தர போதுமான ஆசிரியர்கள் கிடையாது, அறிவியல் பாடம் நடத்தும் ஆசிரியரே, சமூக அறிவியல் பாடத்தையும் நடத்தி வருகிறார். ஆனால், மெட்ரிக் கல்வி நிலையத்தில் போதுமான ஆசிரியர்கள், அமருவதற்கு தரமான இருக்கைகள் என்று எல்லாமே மாணவர்கள் பெற்றிருக்கிறார்கள். இவ்வளவு பெரிய ஏற்றத்தாழ்வுகள் மாநில கல்விக்கும் மெட்ரிக் கல்வி நிலையங்களுக்கும் இருக்கையில், இதையெல்லாம் சமன் செய்யாமல், அனைத்து கல்வி நிலையங்களுக்கும் ஒரே மாதிரியான பாடத்திட்டத்தை மட்டும் அறிமுகப்படுத்திவிட்டு சமச்சீர் கல்வியை அறிமுகப்படுத்தியிருக்கிறோம் என்று சொல்வது முரணான விஷயம். இன்னும் சொல்லப்போனால், சமச்சீர் கல்வித் திட்டம் என்று சொல்வதை பொதுப் பாடத்திட்டம் என்று சொன்னால் அது சரியாகப் பொருந்தும்.

கடந்த ஆண்டு ஒன்று மற்றும் ஆறாம் வகுப்பிற்கு மட்டும் சமச்சீர் கல்வி பாடத்திட்டம் அறிமுகப்படுத்தப்பட்டது. அப்படியானால், இந்த ஆண்டு இரண்டாம் வகுப்பு மற்றும் ஏழாம் வகுப்புக்கும், அடுத்த ஆண்டு (2012) மூன்றாம் வகுப்பு மற்றும் எட்டாம் வகுப்பு, அதற்கு அடுத்த ஆண்டு (2013) நான்காம் வகுப்பு மற்றும் ஒன்பதாம் வகுப்பு இப்படித்தானே சமச்சீர் பாடத்திட்டத்தை அறிமுகப்படுத்தியிருக்க வேண்டும். அப்போதுதானே ஒரு திட்டம் முழுமையாக மாணவர்களிடம் கொண்டுபோய் சேர்க்க முடியும். ஆனால், அப்படியில்லாமல் கடந்த ஆண்டு ஒன்று மற்றும் ஆறாம் வகுப்பிற்கு மட்டும் சமச்சீர் கல்வித் திட்டத்தை அறிமுகப்படுத்திவிட்டு, திடீரென்று ஒட்டுமொத்தமாக அனைத்துப் வகுப்பிற்கும் சமச்சீர் கல்வித் திட்டத்தை இந்த ஆண்டு அவசர அவசரமாக கொண்டு வரவேண்டிய அவசியமும் எங்களுக்கு புரியாத புதிராகத்தான் இருக்கிறது. ஆனால் கடந்த முறை அறிமுகப்படுத்தப்பட்ட பாடத்திட்டத்தில் குறை சொல்லும்படி ஒன்றும் இல்லை. ஆனால், தற்போது அச்சிடப்பட்டுள்ள புத்தகத்தில் சில தவறுகள் இருப்பதாக கூறப்படுகிறது. தற்போதைய அரசு கூறியுள்ளபடி நான்கு வகையான பள்ளிகளின் தரம் எல்லாம் சமன் செய்து, உண்மையிலேயே சமச்சீர் கல்வித் திட்டத்தை அறிமுகப் படுத்த புதிய பாடத்திட்டத்தை முனைப்பாக அறிமுகப்படுத்தினால், அதை வரவேற்கிறோம்.

புத்தகத்தில் குறை இல்லை: தற்போது தயாரிகியுள்ள புத்தகங்கள் அனைத்தும் தரத்தில் எந்த குறையும் இல்லை. இன்னும் சொல்லப்போனால், ஏற்கனவே உள்ள பாடத்திட்டத்தை ஒப்பிடும்போது மாணவர்களின் வாழ்க்கைக்கு தேவையான சிறப்பம்சங்கள் நிறையவே இருந்தன. வழக்கமாக தமிழ்பாடத்தில் செய்யுள், உரைநடை, இலக்கணம் இப்பஐ தனித்தனியாக இருக்கும். ஆனால், சமச்சீர் கல்வி பாடத்தில் அறிமுகப்படுத்தப்பட்ட புதிய புத்தகத்தில் உரைநடை, அதைத் தொடர்ந்து செய்யுள் மற்றும் செய்யுளில் இடம்பெறக்கூடிய இலக்கணமும் இருந்தது. வங்கி விண்ணப்பம், ரயில்நிலையத்தில் முன்பதிவு விண்ணப்பம் என்று முக்கியமான விஷயங்கள் இடம்பெற்றிருந்தன. மனித நேயத்தை வளர்க்கும் விஷயமாக உலகளவில் நடந்த முக்கியமான விபத்துக்கள் அதில் மீண்டு வந்த மனிதர்கள் பற்றிய செய்திகள் இடம்பெற்றிருந்தன. இவ்வளவு நல்ல விஷயங்கள் இருக்கும்போது, ஒரு சில விஷயங்கள் அரசுக்கு ஏற்புடையதாக இல்லாதபட்சத்தில், அந்தப் பகுதியை மட்டும் நீக்கிவிட்டு புத்தகத்தை வெளியிட்டிருக்கலாம் என்கிறார் சமச்சீர் கல்வி பாடத்திட்டத்தில் 7, 8, 9 மற்றும் பத்தாம் வகுப்பு தமிழ் பாட புத்தகம் தயாரிப்பில் ஈடுபட்டிருந்த பெயர் வெளியிட விரும்பாத ஆசிரியர் ஒருவர்.

ச.சீ.இராஜகோபாலன், கல்வியாளர்: கல்வி பற்றிய முடிவுகளில் பயிற்று மொழி போன்ற சில மட்டுமே அரசியல் சார்ந்தவை, மற்றவை ஆசிரியர்கள், கல்வியாளர்கள் எடுக்க வேண்டியவை. பாடத்திட்டம் கல்வியாளறது பொறுப்பு. சமச்சீர் கல்விக் குழுவில் ஒரு முக்கிய உறுப்பினராக நான் இருந்துள்ளதால், இன்று எழுந்துள்ள சில பிரச்சினைகளை விளக்க விரும்புகின்றேன். ஒவ்வொரு பாடத்திற்கும் நான்கு வாரியங்களைச் சார்ந்த மூத்த ஆசிரியர்களைக் கொண்ட உட்குழுக்கள் அமைக்கப்பட்டு, நான்கு வாரியப் பாடத் திட்டங்களையும் ஒபபிடுமாறும், பொதுப் பாடத்திட்டம் வகுக்க வழிமுறைகளைக் கூறவும் கேட்டுக் கொள்ளப்பட்டன. அவ்வுட்குழுக்களின் அறிக்கைப்படி, பாடத் திட்டங்களிடையே பெருத்த வேறுபாடுகள் ஏதுமில்லைஎன்றும், ஒரு சிலவற்றில் மாநில வாரியப் பாடத்திட்டங்கள் கல்வியியல் கோட்பாடுகளுக்கு ஏற்பத் தயாரிக்கப்பட்டதாகவும் கண்டறியப்பட்டுள்ளது. இதன் அடிப்படையில் தயாரிக்கப்பட்டப் பொதுப் பாடத் திட்டக் குழுக்களிலும் நான்கு வாரியத்தைச் சார்ந்த ஆசிரியர்களோடு கல்லூரி ஆசிரியர்களும் இணைந்து செயலாற்றியுள்ளனர். எனவே பாடத் திட்டடங்கள் தரமற்றவை என்றக் குற்றச்சாட்டு தனிப்பட்டவரது விருப்பு, வெறுப்புகளினால் கூறப்படுகின்றது. உட்குழுக்கள் பொதுத் தேர்வு வினாத் தாள்களையும் அலசினர். ஆங்கிலோ-இந்தியன், மெற்றிக் தேர்வுகளில் ஒன்றிக்கு மேற்பட்ட வினாத் தாள்கள் இருந்த போதிலும் ஒரு தாள் கொண்ட மாநில வாரியத் தேர்வை விட அதிக சாய்ஸ் இருப்பது காணப்பட்டது. நன்முறையில் தயாரிக்கப்பட்ட சமச் சீர்கல்வி பாடத் திட்டங்களை முடக்குவது சரியான முடிவல்ல. பாடநூல்களில் முந்தைய ஆட்சியாளரது படைப்புகள் இருப்பது ஏற்புடையதில்லை என்றால் அவற்றை நீக்கி விட்டு பொதுப் பாடத்திட்டத்தை நடைமுறைப்படுத்தலாமே!.

எஸ்.ராஜேந்திரன் (உயர்நிலைப்பள்ளி மேல்நிலைப்பள்ளி பள்ளி தலைமை ஆசிரியர்கள் சங்க முன்னாள் தலைவர்): மாநில கல்வி, மெட்ரிக், ஆங்கிலோ இந்தியன், ஓரியண்டல், சி.பி.எஸ்.சி. என்று பல்வேறு மாதிரியான கல்வி முறைகள் நம் மாநிலத்தில் மட்டுமே இருக்கின்றன. வேறு மாநிலங்களில் இம்மாதிரியான சிக்கலான நடைமுறை கிடையாது. இப்பஐ வேறுபட்ட கல்வி முறையால் மாணவர்களின் கல்வித் தரத்தில் ஏற்ற இறக்கங்கள் இருந்தது உண்மைதான். அதை சரிசெய்வதற்காக அறிமுகப்படுத்தபட்டதே சமச்சீர் கல்வி. தற்போது இந்த சமச்சீர் கல்வி பாடத்திட்டத்தில் குறை இருப்பதாக அரசு குற்றம் சாட்டியுள்ளது. பாடத்திட்டத்தை பொறுத்தவரை கடந்த முறை வெளிவந்த ஒன்றாம் வகுப்பு மற்றும் ஆறாம் வகுப்பு புத்தகங்கள் தரமானவையாகத்தான் இருந்தது. அதில் எந்தவித குறையும் இல்லை. தற்போதுள்ள புத்தகத்தில் குறை இருந்தால், குறையுள்ள பக்கங்களை நீக்கிவிட்டு புத்தகத்தை வெளியிடலாமே. தமிழ் மற்றும் சமூக அறிவியல் பாடங்களில் கடந்த ஆட்சியின் சாதனைகள் குறிப்பிடப்பட்டுள்ளதாக பரவலாகப் பேசப்படுகிறது. அப்படியானால், தமிழ், சமூக அறிவியல் புத்தகங்களை மட்டும் மாற்றியமைக்க நடவடிக்கை எடுத்துவிட்டு, ஏற்கனவே அச்சிடப்பட்டு தயார் நிலையில் உள்ள கணிதம், அறிவியல், ஆங்கிலம் புத்தகத்தை வெளியிடுவதில் என்ன பிரச்சினை இருக்கிறது?
ப. சங்கரநாராயணன், தமிழ்நாடு அரசு மேல்நிலைப்பள்ளி முதுகலை ஆசிரியர்கள் சங்க மாநிலத் தலைவர்: சமச்சீர் கல்வி திட்டத்தை முழுமையாக ரத்து செய்கிறோம் என்று அரசு தெரிவிக்கவில்லை. பாடத்திட்டத்தில் பல்வேறு குறைபாடுகள் இருக்கிறது. அதை கலைந்து, முழுவதுமாக சீர்திருத்தி புத்தகங்களை அடுத்த ஆண்டுக்குள் கொண்டுவரப்படும் என்றுதான் அரசுத் தரப்பில் கூறப்பட்டுள்ளது. சமச்சீர் கல்வித் திட்டத்தில் தற்போது தயாரிக்கப்பட்ட புத்தகத்தில் தொடர்ச்சி சரியாக இல்லை என்றும், அடுத்தடுத்த ஆண்டுகளில் வெளிவரவேண்டிய புத்தகங்கள் அனைத்தும் ஒரே ஆண்டில் அவசரகதியில் தயாரித்ததால், பாடங்களில் பல்வேறு பிழைகளும், குழப்பங்களும் இருப்பதாக கூறப்படுகிறது. அந்த தவறுகளை எல்லாம் கலைந்து, புதிய தரமான எல்லோருக்கும் பொருந்தக்கூடிய சமச்சீர் கல்வி புத்தகத்தை அரசு அடுத்த ஆண்டு வெளியிடுமானால், அதை வரவேற்கலாம்.

இதற்கிடையே சமச்சீர் கல்வியை இந்த ஆண்டு தடைசெய்துள்ள தமிழக அரசை எதிர்த்து, சென்னை உயர்நீதிமன்றத்தில் பொதுநல வழக்கு ஒன்று தாக்கல் செய்யப்பட்டுள்ளது ஒருபுறம் என்றால், இந்த தடைக்கு மெட்ரிக் பள்ளிகள் தங்கள் நன்றிகளை அரசுக்கு தெரிவித்து வருகிறது.

மெட்ரிகுலேஷன்ல படிக்கக்கூடிய அதே பாடத்தை என் பிள்ளைகள் கவர்ன்மெண்ட் ஸ்கூல்ல படிக்கப்போறான் என்று சந்தோஷப்பட்டுக்கிட்டு இருந்தோம். ஆனால், அரசின் இந்த அறிவிப்பு எங்களை கவலையடைய செய்துள்ளது என்ற பெற்றோர்களின் புலம்பல்களும் இல்லாமல் இல்லை. ஆதரவும் எதிர்ப்பும் வலுவடைந்துள்ள இந்நிலையில் அரசு, சமச்சீர் கல்வித் திட்டத்தில் அடுத்த கட்ட நடவடிக்கையாக என்ன செய்யப்போகிறது என்பதை பொருத்திருந்துதான் பார்க்க வேண்டும்.

No comments:

Post a Comment